واصل محمود عبد الرازق شيكابالا، نجم الزمالك السابق، رسائله الداعمة للروح الرياضية، مؤكدًا رغبته في رؤية مباريات خيرية تجمع الأهلي والزمالك وتعود إيراداتها لصالح الرياضيين، إلى جانب دعوته لتهدئة الأجواء بين جماهير الأندية.
وقال شيكابالا خلال ظهوره في برنامج الكورة مع فايق على قناة MBC مصر: “أنا نفسي أشوف ماتشات خيرية بين الأهلي والزمالك ويكون الاستاد متقفل، والإيرادات تتحط للحاجات اللي ليها علاقة بالرياضيين. ونفسي كمان أشوف الأهلي بيلاعب المصري والمشاكل تتحل، والزمالك يلاعب الإسماعيلي والدنيا تصفى”.
وكشف شيكابالا عن موقف إنساني جمعه بالإعلامي إبراهيم فايق خلال فترة كورونا، قائلًا: “في حاجة محدش يعرفها.. شوفت إبراهيم فايق في الجيم، وكان فيه لاعب في الأهلي الناس بتنتقده بشدة. روّحت لإبراهيم وقولتله ياريت تتكلم عنه كويس في البرنامج وتخلي الناس تساعده. اللاعب ده مش بيعرف يلعب تحت الضغط، وأنا لعبت معاه. وعمري ما روّحت قولتله باللي أنا عملته”.
وطالب شيكابالا الجماهير بوقف السباب الموجّه للاعبين وأسرهم قائلًا: “إنت النهاردة بتشتم لاعب بأمه ومراته هتستفاد إيه؟ ممكن تشتمه بكرة مش هتلاقيه موجود. اللاعب ليه أهل، وإحنا بنشجع لازم نفهم دا. بلاش ندوس على الحتة المكسورة. إحنا في لحظة كلنا مش موجودين”.
وتحدث شيكابالا عن ملف دعم اللاعبين، منتقدًا الاهتمام المتأخر بعد الأزمات أو الوفيات، مستشهدًا بحالات مثل محمد صبري وأحمد رفعت، قائلًا: “الدنيا مش مستاهلة اللي بنعمله. نقعد شهر أو اتنين نتكلم عن محمد صبري، وبعدين كله بينسى. فيه لاعيبة في الدرجات التانية والتالتة والرابعة محدش يعرفهم.. لو حصل لهم ظرف زي ده أسرتهم هتعيش إزاي؟ محمد صبري معروف والناس هتقف معاه، إنما غيره؟ لازم المسؤولين يشوفوا ظروف اللاعبين في الدرجات التانية والتالتة”.
وأضاف: “بعد أحمد رفعت اتكلمنا شهر واتنين.. حد اتعاقب؟ حد عمل حاجة؟ لاء، بنستنى الناس تتوفى ونتكلم عنهم حلو. طيب ليه ما بياخدوش حقهم وهما عايشين؟ يا رب يكون درس. الدنيا مش مستاهلة”.
