وجه المهاجم الفلسطيني وسام أبو علي، رسالة وداع إلى جماهير الأهلي بعد إتمام انتقاله رسميًّا إلى صفوف كولومبوس كرو الأمريكي.
وأكد أبو علي أنه سيعود يومًا ما إلى القلعة الحمراء، موجهًا شكره لكل من دعمه خلال رحلته القصيرة مع الفريق الأحمر.
وكتب عبر حسابه في “إنستغرام” رسالة طويلة قال فيها: “جماهير النادي الأهلي العظيمة، جه الوقت لكتابة الرسالة الصعبة دي.. أولًا، عايز أشكر الكابتن محمود الخطيب ومجلس الإدارة اللي وقفوا جنبي من أول يوم، وساعدوني وقت الشدة زي ما شاركتوني اللحظات الحلوة”.
وأضاف في رسالته: “أنا ممتن جدًّا للفرصة اللي حصلت عليها من سنة ونص. الأهلي كان منصة أظهرت من خلالها شخصيتي وقدراتي للعالم. تعلمت فيه معنى الفوز، وعرفت طعم البطولات، والمشاعر دي هتعيش معايا طول حياتي”.
وتابع: “شكرًا لكل اللاعبين والمدربين والجهاز الفني، والناس اللي اشتغلت معاهم. دي كانت عيلتي التانية. الذكريات والعلاقات دي هتفضل محفورة جوايا”.
وواصل: “النهارده سبت النادي وأنا مرفوع الرأس، لأني قدمت كل ثانية في الملعب بإخلاص، وبدموع في عيني وأنا بسيب الغرفة. أنتم شجعتوني، ورفعتوا راسي، وخليتوني أعيش بالفخر قدام عيلتي، وقدام فلسطين بلدي”.
واختتم رسالته قائلًا: “لو زعلت حد فيكم، بعتذر. لكن اللي أقدر أعدكم بيه إن اللحظة دي هترجع. سنلتقي مجددًا”.
