تحدث حسام غالي، عضو مجلس إدارة النادي الأهلي المصري، عن إمكانية ترشحه لرئاسة القلعة الحمراء بعد عمله خلال السنوات الماضية في مجلس الإدارة برئاسة محمود الخطيب.
وقال حسام غالي في تصريحات إعلامية: “الكلام عن تحضيري لرئاسة الأهلي بالفعل بيضع ضغط كبير عليا، وبالتأكيد نفسي أخدم النادي زي ما خيره عليا إنه وضعني في المكانة دي أمام الجماهير”.
وأضاف غالي: “ناس كتير وضعت آمال كبيرة عليا، وأنا شايف نفسي رئيس الأهلي وممكن أحقق طموح الجماهير اللي شيفاني رئيس النادي، وممكن أحقق اللي طول عمرهم بيحلموا بيه كمبادئ النادي وشخصيته واسمه علشان أنا حافظهم”.
وواصل حسام غالي تصريحاته: “لما دخلت في الإدارة وشوفت الدنيا على حقيقتها مش من بعيد، حسيت إني مش قادر أمسك سيف ودرع وأدخل المعركة دي حاليًا، طول عمري ماسك سيف ودرع وبحارب الناس كلها من وقت ما كنت لاعب صغير لحد ما اعتزلت”.
وأوضح: “طول الوقت بحارب الإعلام أو الجمهور أو مدرب مش عايز يلاعبني، ومأخدتش استراحة محارب بعد ما بطلت كورة دخلت في العمل الإداري”.
وشدد: “أنا عندي الرغبة أبقى رئيس الأهلي في يوم من الأيام بس حاليًا مش قادر أدخل المعركة، بعد ما شوفت تكالب بني أدمين كتير وصراعات كبيرة إنها تكون في الحتة دي، وتدي كتف أو خنجر للشخص اللي الجمهور شايف إنه الأنسب في المكان دا، وأهم حاجة إننا نشوه الصورة أو الانطباع دا إنه غلط”.
واختتم حسام غالي تصريحاته: “دائمًا فيه خناجر بتتحط في الضهر، وانا قادر أحارب بس وقتها هتطلع حاجات سيئة جدًا، وعمري ما هحارب حروب غير شريفة أو غير نزيهة، أنا دايمًا حربي شريفة ووش في وش، أنا بمجهودي وعرقي هاخد اللي أنا عايزه”.
