أعاد ناصر منسي، مهاجم فريق الزمالك المصري، اعتذاره لجماهير القلعة البيضاء واللاعبين، وأضاف اعتذارا للجهاز الفني بقيادة معتمد جمال، بعد واقعة إلقاء قميص النادي والبصق عقب تسجيله هدفا أمام الجيش الرواندي، مؤكدًا أنها مجرد لحظة حماس.
وقال منسي عبر صفحته الرسمية على إنستجرام: “استكمالًا وتوضيحًا لما بدر مني خلال المباراة الأخيرة، فإن ذلك ما كان إلا لحظة حماس ونتاجًا لضغوط الملعب التي يتعرض لها اللاعبون بصفة عامة، وهي ضغوط غير مبررة في عالم الاحتراف، تنقضي بالفوز والانتصارات”.
وتابع: “أؤكد اعتذاري للجمهور والإدارة والجهاز الفني بقيادة الكابتن معتمد جمال، وزملائي اللاعبين، وإن شاء الله القادم أفضل، نعدكم، خليكم في ضهرنا”.
اعتذار ناصر منسي الأول لجماهير الزمالك
وكتب ناصر منسي عبر حسابه: “جمهور الزمالك العظيم بيتي وأهلي وسندي بعد ربنا، أنا بكتب الكلام ده وأنا حاسس إني لازم أعتذر لكل زملكاوي زعل مني”.
وواصل ناصر منسي: “سبب رمي التيشيرت كان تصرف غلط، وأنا بعتذر عنه بكل صدق، ومهما كان الضغط أو الانفعال اللي كنت بمر بيه، ده مش مبرر للتصرف ده، وأنا متقبل أي عقوبة”.
وأفاد: “نادي الزمالك وجمهوره ليهم فضل كبير عليّ بعد ربنا، وعمري ما أنكر فضل المكان اللي اداني الثقة والفرصة، ولا أنسى حب الجمهور اللي دايمًا كان سند ليا. كل هدف بجيبه، وكل نجاح بوصل له، وراه فضل ربنا ودعم النادي وجمهوره وزمايلي وكل الناس اللي واقفة جنبي”.
وأكمل: “أنا واحد منكم، والزمالك بالنسبة لي مش مجرد نادي، الزمالك بيت وعيلة وانتماء، وناصر منسي عمره ما ينسى فضل الزمالك وجمهوره عليه”.
وواصل: “إحنا عيلة واحدة، ومهما حصل مش هنسمح لأي حاجة أو لأي حد يفرق بينا. يمكن نختلف أو نزعل، لكن اللي بينا أكبر من أي موقف، وحب الزمالك هو اللي بيجمعنا دايمًا”.
وأضاف: “حقكم عليّا، وبعتذر لكل زملكاوي زعل مني، وإن شاء الله أرد الاعتذار ده في الملعب بأدائي واجتهادي، وأفضل عند حسن ظنكم بيا”.
وأتم: “عاش الزمالك، وعاش جمهوره العظيم، جمهور الزمالك دايمًا في القلب”.
